Nadadag ang isa ka tricycle sa sapa sa Purok Puerto, Brgy Mandalagan, Bacolod City, alas- 4:00 kahapon sang kaagahon.
Ang driver sang tricycle ginkilala nga si Rene Juaneza, 38 anyos, residente sang Brgy Tabunan, Bago City.
Sa interview sang Bombo Radyo kay Police Captain Ramie Sayson, Officer in Charge sang Bacolod Police Station 3, may natabo nga aksidente kun sa diin involved ang fortuner kag tricycle nga ginrespondehan sang kapulisan.
Suno diri, magamay lamang kun tani ang guba sa salakyan apang wala nagpasettle ang tag-iya kag naghambal nga ihulog sini ang tricycle.
Kasunod sini, nagbalik ang traffic investigator sa ila estasyon apang may nabaton sila nga report nga may tricycle nga nadagdag sa sapa kag nakilal-an nga ini ang tricycle nga involved sa aksidente.
Samtang, nagpahayag naman si Juaneza nga may gindul-ong ini nga pasahero sa lugar kag naghambal ang pasahero nga makuha lang ini sang plete apang gin-updan siya ni Juaneza.
Sa pagbalik sini, nakita niya na lamang nga nahulog na sa sapa ang iya tricycle.
Natigayon nga nakuha ang tricycle sa bulig sang Bacolod Chamber Volunteer Fire Brigade apang indi na ini mag-andar.
