Nakaschedule nga magpa-DNA test subong nga adlaw si Trisha Antiquera agud makumpirmar kun iya live-in partner, iloy kag stepfather ang mga kalabera nga nasapwan sa sulod sang kampo sa Hacienda Garcia, Barangay Alangilan, Bacolod City.
Madumduman nga namissing ang live-in partner ni Trisha nga si Junel Nangan, iloy nga si Loreville Antiquera, kag live-in partner sang iya iloy nga si Joen Villacojer sadtong Hunyo 2, 2024.
Ulihi nga nakit-an nga ginsulod ang tatlo sa salakyan nga puti kag tubtob sa karun wala nakit-an.
Una nga may nasapwan nga kalabera sa nasambitan nga kampo sang Nobyembre 2024 samtang nasundan sang duha pa ka kalabera sang Miyerkules.
Sa interview sang Bombo Radyo Bacolod kay Trisha, dapat kun tani sa Lunes ini mapa-DNA apang ginpakamaayo na lamang sini nga maggiyo sang timprano.
Suno diri, madugay pa antes maabot ang result apang aminado ini nga kun magpositibo gid man ang resulta, wala siya nakahibalo kun mabaton bala niya ang natabo.
Suno pa sa iya, kun kumpirmado man gid nga iya himata ang mga nasapwan nga kalabera, ang maayo lang diri nakit-an na sini ang iya himata kag mahatagan sang nagakaigo nga paglubong apang tubtob sa karun may gamay pa ini nga paglaum nga buhi pa ang iya mga himata.
