Nakuhaan na sang DNA sample para sa testing ang himata sang naga-claim sang tatlo ka mga kalabera nga narekober sa Hacienda Garcia, Barangay Alangilan sa ciudad sang Bacolod.
Sa interview sang Bombo Radyo Bacolod kay Trisha Antiquera ang anak ni Lorebelle Antiquera nga isa sa mga namissing, ginkumpirmar sini nga ginkuhaan na siya sang DNA sampling kaupod ang iya bata kag ang iloy sang ka live-in sang iloy sini.
Nahibaluan nga ang mga missing person amu nanday Lorebelle Antiquera, Joem Villacoger, kag Jonel Nangan, nga lunsay residente sang Brgy. Mansilingan ciudad sang Bacolod.
Suno kay Trisha, hulaton pa sini ang resulta sang DNA bangud ini ang natalana nga magwa matapos ang 45 ka adlaw.
Suno diri kun makumpirmar gid man nga iloy sini ang isa sa mga nasapwan ang pagahatagan sini sang desente nga paglupong.
Sa karun 70/30 ang pagpati sini nga ang isa sa mga nasapwan ang iloy sini bangud sa nakita nga pustiso sa naibabaw nga bahin sang ngipon sini.
