BACOLOD CITY – Indi magnubo sa lima ka persona ang pilason sa pagbunggo sang isa ka Canter truck nga nagasakay sang mga bolante sang saging sa buli sang dump truck sang IPM nga nagahakot sang basura sa Barangay Tangub las-4:30 kaina sang kaagahon.
Ginpahayag nga nagasundanay ang duha ka mga salakyan apang sang nagliko ang truck sang IPM agud magkuha sang basura sa lane padulong sa pihak nga direksyon apang hinali nag-ungot sa buli sini ang pula nga canter truck.
Suno kay Samuel Bonghanoy, driver sang dump truck, malayo pa ang antad sang canter sang ini ang nagliko apang wala ini gilayon nakasaylo sa pihak nga lane bangud nga may sugata.
Apang bangud nga madasig ang dalagan sang truck, ini ang nagbunggo sa buli sang truck sang basura.
Apang suno naman kay Maximo Tia, 35-anyos sang Guihulngan, Negros Oriental, mahinay lamang ang dalagan sini apang nabungguan sini ang buli sang IPM dump truck bangud wala nag-signal light ang isa ka driver.
Isa ka lalaki kag tatlo ka mga babayi ang gindala sa hospital samtang may isa pa ka lalaki nga may pilas sa agtang ang wala naman nagpadala sa hospital.
