BACOLOD CITY — Ginakabig ni Bacolod Lone District Congressman Greg Gasataya nga kadalag-an ang pagpirma ni Presidente Rodrigo Duterte sang layi nga nagalibre sang tuition fees sa tanan nga kolehiyo nga ginapanag-iyahan sang gobyerno.
Sa interview sang Bombo Radyo, ginpahayag ni Gasataya nga sa katapusan, nahatagan na sang katumanan ang ginahandum sang tanan nga makaangkon sang layi nga nagagarantiya nga wala sang balayran nga tuition fee sa tanan nga eskwelahan sang gobyerno paagi sa Free Tertiary Act.
Aminado ang kongresista nga antes mapasar ang layi, nangin mainit pa ang diskusyon sini sa budget hearing bangud nagapati ang finance managers sang gobyerno nga indi masarangan sang pundo ang pagpadayon sini nga programa.
Sa baylo, ang ila ginaduso amo ang scholarship para sa mga pigado nga indi makasarang mag-eskwela sa kolehiyo.
Apang sa gihapon, napasar ini sa Kongreso kag napirmahan naman ni Presidente Rodrigo Duterte agud mangin layi.
Suno kay Cong. Gasataya, malipayon siya nga nangin kabahin sa pagpasar sini nga layi bilang vice-chairman sang Committee on Higher and Technical Education sa Kamara de Representantes.
FREE TUITION SA BACOLOD CITY COLLEGE
Samtang, mahimo man nga malakip ang Bacolod City College (BCC) sa mga eskwelahan nga may libre nga tuition fee sa idalom sang Free Tertiary Act.
Ini ang ginpahayag ni Bacolod Lone District Cong. Greg Gasataya, vice-chairman sang Committee on Higher and Technical Education sa Kamara, apang paathag sini, kinahanglan makaangkon sang BCC accreditation agud malakip siya sa programa.
Suno kay Gasataya, sadtong Mayo pa sini ginapahikot sa panguluhan sang BCC ang ila accreditation sa Commission on Higher Education (CHED) agud malakip sa mga eskwelahan sa diin libre ang tuition fees.
Liwat siya nagpadala sang papeles sadtong Hunyo agud ma-follow-up ang mga papeles kun sa diin nasaad ang mga rekisitos para sa accreditation.
Aminado naman si Gasataya nga magadamo ang mga estudyante sa SUCs kun lubos na nga mapatuman ang layi apang mahimo ini nga preparahan sang gobyerno.
