Naka-eksperyensya sang mahinay nga internet connection ang Pilipinas kahapon matapos ginreport ang insidente sang outage sa submarine cable segments ukon internet data cable nga nagakonekta sang pungsod sa Singapore kag Hongkong.
Nagpagwa naman sang advisories ang mga telecommunications companies nga nagpaabiso sa mga subscribers nga ang problema sa nasambit nga kable ang makaapekto sa internet speed.
Santo sa Department of Information and Communications Technology (DICT), gina-imbestigahan na nila ang gintunaan sang cable disruptions.
Suno kay DICT Secretary Henry Aguda, isa sa mga ginalantaw nga anggulo ang posible nga pagsabotahe.
Apang ginpahayag man ang posibilidad sang equipment failure ukon may nautod nga fiber.
Ginpasiguro naman sang opisyal nga wala nadula ang internet connectivity kag ginadihon na sang mga kompaniya ang mga tikang nahanungod sa kapasidad sang internet connection.
