Alas-5:00 kaina sang aga, ang Typhoon Pepito ang padayun nga nagahulag sa naaminhan-nakatungdan sang West Philippine Sea.
Ang sentro sang bagyo ang ulihi nga nasiplatan 145 km West sang Sinait, Ilocos Sur.
Dala sini ang kabaskugon sang hangin nga nagadangat sa 130 km/h kag pagmadlos nga tubtob 160 km/h samtang nagahulag sa kadasigon nga 30 km/h.
Sa karun, yara gihapon sa Tropical Cyclone Wind Signal No. 3 ang northern kag western portions sang Ilocos Sur, northwestern portion sang La Union, kag western portion sang Abra.
Signal No. 2 naman sa Ilocos Norte, nabilin nga bahin sang Ilocos Sur, nabilin nga bahin sang La Union, Pangasinan, nabilin nga bahin sang Abra, western portion sang Mountain Province, Benguet, kag northern portion sang Zambales.
Samtang Signal No. 1 naman sa Apayao, Kalinga, nabilin nga bahin sang Mountain Province, Ifugao, western portion sang Cagayan, Nueva Vizcaya, northern kag central portions sang Nueva Ecija, Tarlac, kag central portion sang Zambales.
Ang Bagyo Pepito ang ginalantaw nga padayun nga magahulag sa northwestward tubtob west northwestward nga dereksyon sang West Philippine Sea tubtob nga makagwa sa Philippine Area of Responsibility subong nga aga ukon sa hapon.
Sa gwa sang PAR, ang bagyo ang ginalauman nga maliko sa nakatungdan ukon sa west southwestward nga dereksyon bwas bangod sa impluwensya sang palaabuton nga northeasterly wind surge.
Padayun man nga magahuyang ang bagyo samtang yara sa West Philippine Sea bangod sa indi paborable nga environment tubtob na sa kagab-ihon sang Miyerkules ukon Huwebes sa kaagahon kun sa diin ini ang ginalauman nga yara na sa kadagatan sang Southern China.
