May natukiban nga tunnel sa isa ka ginakay-o nga commercial building sa corner Luzuriaga-Gatuslao Street, Bacolod City.
Sa interview sang Bombo Radyo Bacolod kay Joe Fajanel, foreman sa Buildura, natukiban nila ang tunnel sa idalom sang duta sang sila ang nagkutkot sang duta para kuntani himuon sang pundasyon nga suporta sa obrahon nga hagdanan.
Apang nakibot sila nga may-ara sang buho sa idalom sang salog, nga sa umpisa ginpinsar nila nga drainage.
Sang gintsekyar, ini ang indi man kaangay sang drainage, kundi makabig nga isa ka tunnel nga makaigo ang duha ka persona.
Ang tunnel ang nagakonekta naman sa pihak nga building apang nasirado na.
Suno kay Fajanel, nakabati na ini sadto sang sugilanon gikan sa mga nagabaligya sang ukay-ukay sa gwa, nga ang building ang ginrentahan sadto sang gina-alegar mga kawatan, kag ang tunnel ang ginagamit agud makalapos sa pihak nga establishimento.
Sa pagpangusisa sang Bombo News Team, gina-alegar nga sadto isa ka pawnshop ang negosyo nga katupad sang building.
Agud indi na masudlan, ginsirad-an na lamang nila ang buho gikan sa ginaconstruct nila nga building kun sa diin ang sementado nga salog ang ginbutangan nila sang mas madamo kag mas mabakod nga kabilya agud indi nagid malutsan.
