Suportado sang Land Transportation Franchising and Regulatory Board (LTFRB) Region 6 ang ginpatigayon nga Unity Walk sang mga yara sa sektor sang modernized jeepney kahapon.
Sa interview sang Bombo Radyo Bacolod kay LTFRB Region 6 Director Richard Osmeña, kinamatarong sang mga kooperatiba kag korporasyon nga magpatigayon sang protesta batok sa Senate Resolution No. 1096 nga nagapanawagan kay President Ferdinand ‘Bongbong’ Marcos Jr. nga isuspender ang Public Utility Vehicle Modernization Program.
Panindugan sini nga indi suspension ang solusyon sa problema.
Paathag ni Osmeña nga may 10 ka bahin ang Local Public Transport Route Plan (LPTRP), kag diri na lamang dapat lantawon kun sa diin ang dapat ma-imprubar.
Panindugan sang LTFRB 6 Director nga kun suspendihon ang programa, magabalik nagid sa umpisa.
Ini ang indi naman nagakadapat bangod madamo na sang nakautang sang modernized jeepney units.
Paathag ni Osmeña nga siya ang nagapamatok sa total suspension sang programa, apang siya ang maga-ugyon naman kun magapatigayon lamang sang revision sa pila ka mga provision.
Bangod napasa na ang Senate resolution kag President Marcos, ginahulat na lamang nila ang mangin desisyon sang Presidente.
