BACOLOD CITY – Makabaton sang financial assistance ang mga residente nga nadulaan sang puluy-an matapos ginlaslasan sang naglabay nga buhawi sa duha ka ciudad kag isa ka banwa sa probinsiya sang Negros Occidental kagab-i.
Ini ang pareho nga ginpahayag nanday Mayor Enrique “Bebot” Miravalles sang Valladolid kag Dr. Merrygin Ortizo, ang nagapamuno sang City Disaster Risk Reduction and Management Office (CDRRMO) sang Bago City, nga pareho nga apektado sang naglabay nga buhawi las-7:30 kagab-i.
Suno sa ila, nagapatigayon sa karon sang assessment ang Provincial Social Welfare and Development Office (PSWDO) sa ginbilin nga kahalitan sang buhawi sa tatlo ka mga barangay sa Valladolid, sa isa ka barangay sa Bago City, kag subong man sa La Carlota City, nga amo ang mangin basehan sang balor sang shelter kag financial assistance nga igahatag sa apektado nga mga residente.
Una na nga ginhatagan sang food packs kag relief assistance ang 39 ka mga pamilya nga naapektuhan sang buhawi.
