Mainit nga gin-abi-abi sang Chinese Government si US President Donald Trump pag-abot sini sa Beijing, China kahapon sang gab-i para makighinun-anon kay Chinese President Xi Jinping.
Pagpanaug ni Trump sa Air Force One, ginsugata ini ni Chinese Vice-President Han Zheng sa tunga sang engrande nga seremonya kag red carpet welcome.
Suno sa mga analyst, nagapakita ini sang pagrespeto sang Beijing kay Trump.
Kaupod man ni Trump ang iya bata nga si Eric Trump, pati ang pila ka mga kilala nga personalidad sa industriya sang teknolohiya kalakip nanday Elon Musk sang Tesla kag Jensen Huang sang Nvidia.
Sa isa ka social media post antes maghugpa sa Beijing, ginpahayag ni Trump nga ipangabay niya kay Xi na mag “open up” ang China para sa mga Amerikano nga innovators kag technology leaders.
Ginalauman nga mangin sentro sang paghinambalanay nanday Trump kag Xi amo ang nagapadayon nga tensyon sa tunga sang Estados Unidos, Israel, kag Iran.
Ang China ang nagadepende man sa oil exports naggikan sa Iran.
Ginapanawagan man sang Amerika sa Beijing nga gamiton sini ang impluwensiya sa ekonomiko kag politika sa Iran agud mabuhinan ang tensyon sa rehiyon.
Madugay na nga magkaalyado ang China kag Iran, ginakilala ang China bilang pinakadako nga trading partner sang Tehran.
