Ginalantaw sang political analyst nga sa karun mas mataas ang tyansa ni Vice President Kamala Harris kun ipaanggid kay former President Donald Trump sa palaabuton nga US Presidential Election.
Sa interview sang Bombo Radyo Bacolod kay Atty Jomax Ortiz, kun lantawon madamo sang bad records si Trump bangod ini ang nagaisahanon nga US Presidential Candidate nga makaduha na ma-impeach sang siya ang Presidente kag madamo sang conviction.
Ginatinguhaan sini nga magdaog agud makontrolar ang prosecutor kag madula na ang mga kaso.
Sa pihak nga bahin indi man ma-underestimate si Kamala bangod ini ang nangin First Vice President na kag anay isa man ka Provincial Prosecutor.
Suno kay Ortiz, dako ang tyansa nga madamo sang mga babayi nga Americans ang magabaylo sa pagsuporta kay Kamala ilabi na nga mayorya sang Americans ang mga babayi kag mabaskog sa karun ang Women’s right sa pungsod.
Ginpaanggid man sini kay former First Lady Hillary Clinton nga nagdaog sadto batok kay Trump sa popularity vote apisar nga ini ang wala nangin Bise Presidente, apang napierde sa electoral college.
Dugang pa ni Ortiz nga madamo man sang mga nangin babayi nga lider sa nagkalainlain nga pungsod nga nakapamatuod nga sila ang may ikasarang sa pagpamuno, kag kun kaisa mas maayo pa sangsa mga lalaki nga lider.
Suno sa abogado indi kaangay kay Hillary, nga may nagtuhaw nga mga issues, sa karun wala sang kamalamalahan nga nakita kay Kamala.
Dugang pa sini disente ang panulok sa karakter ni Harris indi kaangay kay Trump nga nagapagwa sang mga below the belt nga mga komento.
Tunga man ang panulok sang Republicans kag Democrats sa attempted assassination bangod ang Republicans ang nagapanindugan nga ini ang ginluthang bangod sa kahadlok nga magdaog, apang nakaluwas bangod nagakadapat pa nga mangin Presidente.
Samtang ang Democrats ang nagapahayag naman nga ini ang ginluthang bangod tunto nga sahi sang tawo.
Indi naman mandatory ang pagpatigayon sang debate kundi ini ang nakaandan na lamang, gani mahimo nga wala sang matabo nga debate antes ang November 5 elections.
