Nagsapol na ang Vaccination Center Action Team sang Bacolod City COVID-19 Vaccination (CoVac) Council agud hambalan ang ila mga plano.
Sa interview sang Bombo Radyo Bacolod kay Councilor Renecito Novero, chairman sang Vaccination Center Action Team, ginpahayag sini nga ang kada miyembro sang CoVac council ang may yara sang team kag lain-lain nga responsibilidad kun sa diin liwat naman nga na-assign sa iya amo ang center ukon lugar nga tipunan para sa pagbakuna.
Nahibaluan nga si Novero man ang pinuno sang Quarantine Center Action Team sa ciudad nga responsable sa mga quarantine facilities.
Suno kay Novero, nagmeeting na sila kahapon sang iya nga teem agud diskusyunan kun sa diin posible ibutang ang vaccination centers.
Ginkumpirmar naman sini nga gintugutan ni Bacolod City Schools Division Superintendent Gladys Amelaine Sales nga gamiton ang mga eskwelahan sa Bacolod.
Sa karon may yara na sila sang 20 ka mga eskwelahan nga gintumod bilang vaccination centers.
Magluwas diri, ila man ginplanuhan ang ila pagahimuon pananglitan nga may yara sang brownout nga magluntad para sa storage facilities kag generators para sa mga center.
Natalana naman sila nga magsapol sa masunod nga semana agud maghimo sang final recommendations para kay Mayor Evelio “Bing” Leonardia.
