Nag-anunsyar ang pila ka mga abogado sang plano nga mag-file sang ‘Verified Complaint for impeachment’ batok kay Commission on Elections Chairman George Erwin Garcia kag anum pa ka Comelec Commissioner.
Suno sa reklamo nga ginfile nanday Atty. Eldrige Marvin Aceron kag Atty Sikini Labastilla, gina-akusaran nila ang mga respondents sang paglapas sa Republic Act No. 8436 ukon Automated Election System Law, betrayal of public trust, kag iban pa angot sa duha ka magkasunod nga eleksyon.
Ginpagwa sang nasambit nga mga abogado ang apat ka basehan sa pagfile sang impeachment nalakip diri ang gina-alegar paggamit sang ‘software’ sa masobra 100,000 ka automated counting machines sa nakaligad nga election sang wala pa ginpaidalom sa mandatory Source Code Review.
Samtang sa betrayal of public trust naman, ang paggamit sang indi otorisado nga intermediary server nga nagtuga sang pagka-delay sa pagdala sang datos sa mga gintalana nga ‘transparency servers’.
Para sa ikatatlo nga akusasyon, ang pagtago sang impormasyon sang tinalikdan nga 2022 elections sa gingamit nga isa ka private IP address para sa masobra 20,000 vote counting machine modems.
Sa pinakaulihi nga reklamo, ini ang natuhoy sa pagpili ukon selective enforcement sang ‘campaign finance laws’ nga gina-alegar nangin pabor sa pila ka mga senador nga kaalyado sang administrasyon kaangay nanday Sen. Chiz Escudero kag Sen. Rodante Marcoleta.
