Ginarekomendar sang bise-alkalde sang Bacolod City nga magbutang sang suga kag CCTV camera sa atubang sang mga balaligyaan kag establishments.
Ini ang kaangot sa pag-aresto sang mga suspetsado nga nagpanugod sang sunog sa Java Pension House sa corner Gonzaga-Locsin Streets, ciudad sang Bacolod sang Martes.
Sa interview sang Bombo Radyo kay Vice Mayor El Cid Familiaran, ginpahayag sini nga dako ang nabulig sang mga CCTV camera sa tupad nga area sang pension house agud makilal-an kag matumod ang mga suspetsado gani ginarekomendar sini ang pagpatakod sang CCTV sa mga establishments sa Bacolod.
Gindugang niya man nga may yara sang ordinansa nga dapat may yara gid sang suga sa gwa sang mga tindahan kada gab-i agud masanag ang palibot kag mapunggan ang krimen.
Aminado si Familiaran nga kinahanglan maggasto agud makapatakod sang CCTV kag suga apang suno sa iya, dako ang mabulig sang mga ini para sa seguridad sang mga business establishments.
