Wala sang ihibalo ang Vice President kag iban pa nga elected officers sa Central Negros Electric Cooperatives (CENECO) Union of Rational Employees (CURE) sa notice of strike nga ginsumiter sa National Conciliation and Mediation Board (NCMB).
Sa interview sang Bombo Radyo Bacolod kay CURE Vice President Marbie Cabardo, nakibot na lamang sila sang makita sa facebook nga nagpapresscon na si CURE President Felix Gepilga Jr. kag Atty. Rey Gorgonio nga sila ang nagsumiter sang notice of strike, nga gintawag sini usurpation of authority.
Paathag ni Cabardo nga si Gepilga ang nagpungko bilang Presidente sang union matapos magdaog sa eleksyon sang Marso 3, samtang siya nga anay Acting President sa CURE apang wala nagpapili, ang napabilin nga Vice President.
Suno diri, humalin palang sang magpungko wala na ginakilala ni Gepilga ang mga elected officer, as baylo siya ang nag-appoint sang bag-o nga officers.
Panindugan ni Cabardo nga sila ang indi komporme kag positibo ini nga 100 tubtob 200 gikan sa 323 ka mga rank and file employees nga member sang CURE ang indi mag-upod inkaso mapahanugutan ang notice of strike.
Suno diri, indi pa nagakadapat ang pagfile sang notice of strike bangod ini ang last option lamang.
Panindugan ni Cabardo nga bukas ang management sa negosasyon kag ini ang dapat maglabay sa husto nga proseso.
Ang importante suno diri, amo nga indi ma-apektuhan ang pagserbisyo sa mga konsumedor.
Ginkwestyon man sini ang pagkalider ni Gepilga, kun umpisa pa lamang wala na ini nagasunod sa by laws sang union.
Dugang pa nila nga naterminate na bilang legal council sang CURE si Atty. Gorgonio.
Suno diri, rasun sang duha sa pagfile sang notice of strike, ang nahanungod sa security of tenure sang mga empleyado sang CENECO, nga nagabayolar sa Collective Bargaining Agreement sa pagsulod sang Negros Electric and Power Corporation (NEPC).
Apang paathag ni Cabardo nga may priority hiring ang NEPC para sa mga empleyado, kag pila sa ila ang nakapasa na sang application.
Panawagan ni Cabardo sa grupo ni Gepilga nga paminsaran kag mangita sang pamaagi nga indi makatuga sang internal conflict bangod ini ang para man sa bwas damlag sang ila pamilya.
