Nagapabilin nga suportado sang Visayan bloc si President Ferdinand “Bongbong” Marcos Jr.
Suno kay Bacolod City Lone District Representative Alfredo “Albee” Benitez, ginforward nila sa ila nga group chat ang video sang rebelasyon kag ang mga miyembro ang nagpahayag sang suporta sa presidente.
Suno kay Benitez, ang rason nga ginasuportahan nila ang presidente bangud sa maragtas sang Pilipinas si Marcos pa lamang ang nagaisahanon nga presidente nga ginpaimbestigaran bisan ang iya kaugalingon nga administrasyon.
Suno diri, sa Marcos administration pa lang natabo nga bisan kaalyado kag abyan ang ginapaimbestigaran kun may yara sang anomalya nga makit-an.
Dugang pa sini nga ang tikang sang presidente nga mapahagan-hagan ang korupsyon sa pungsod ang dapat nga suportahan.
Suno kay Benitez nangin aware ang mga pumuluyo sa issue sang korapsyon bangud sa mga tikang nga ginahimo sang presidente.
Suno diri dapat nga buylugan ang tikang sang mga pumuluyo kag maghimo sang tikang agud malikawan ang korapsyon sa palaabuton.
Naghatag man sang reaksyon si Bacolod City Lone District Representative Alfredo “Albee” Benitez angot sa pagbuyagyag ni Presidential sister Imee Marcos nga ang iya utod nga si President Ferdinand “Bongbong” Marcos Jr ang nagagamit sang illegal nga druga.
Suno kay Benitez, wala sang may nakahibalo kun ano ang purpose sang senadora sa pagbulgar sini nga naggamit sang ginadumilian nga druga ang presidente kag ang first lady.
Suno diri, kun pamatian kaangay nga concerned gid ini sa iya nga manghod apang ang pamaagi sini ang indi manami.
Suno sa kongresista dapat wala niya ini ginbuyagyag sa publiko kun matuod nga nagaulikid ini sa iya nga utod.
Indi naman bag-o ang nasambit nga alegasyon bangud bisan si former President Rodrigo Duterte ang may kaangay man nga alegasyon kay Marcos.
