Ginpahayag sang abogado kag anay konsehal sa ciudad sang Bacolod nga bilang abogado dapat mas nakahangop si Vice President Sara Duterte nga dapat resputuhon ang korte, local man ukon international.
Ini kasunod sa latest pronouncement ni VP Sara nga naga-alegar sa International Criminal Court nga tuta ni former Senator Antonio Trillanes IV kag President Ferdinand “Bongbong” Marcos Jr.
Dugang pa sang Bise Presidente nga male-maleta nga kwarta ang gina-estoryahan, nga nagakahulugan nga ang korte ang ginabayaran.
Sa interview sang Bombo Radyo Bacolod kay Atty Renecito Novero, bisan ordinaryo nga tawo ang nakahibalo nga dapat respetuhon ang korte, gani mas labi nga dapat nakahibalo ang isa ka abogada.
Pahanumdom pa sini nga bisan indi nagapanguna nga pinuno sang pungsod, si VP Sara ang nagarepresentar gihapon sa bilog nga Pilipinas.
Suno diri, bilang abogada, nakahibalo si VP Sara kun paano ginapanguyatan sang hukom ang dignidad, competence, kag dedikasyon sa serbisyo, gani indi sini dapat nga higkuan.
Para sa iya ang paghigko sang Bise Presidente sa dignidad sang ICC ang makonsiderar nga “libelous.”
Panawagan sini nga sa pagdepensa sa kaso, dapat ini ang himuon sa professional nga paagi.
Dugang pa sini nga wala gid sang mabulig ang mga pronouncement ni VP Sara, kag ini ang makapalain pa sa iya amay nga si former President Rodrigo Duterte hinali mabatian sang mga ICC judges ang komento.
Ginkontra man sini ang pahayag sang Bise Presidente nga ang kaso ni former President Duterte lamang ang gina-uyatan sang ICC, bangod sila ang nagpadala naman sang warrant of arrest batok kanday Israeli Prime Minister Benjamin Netanyahu kag Russian President Vladimir Putin.
Ang kinalain lamang, indi basta-basta maserbe ang arrest warrant bangod sa mga makagagahom nga pungsod.
Pahanumdom pa ni Novero nga ang Crimes Against Humanity nga kaso ni former President Duterte ang para sa pagpangita sang hustisya sang mga nalisdan sang pamilya bangod sa drug war.
Suno diri, kaangay nga wala gid sang pag-unong ang Bise Presidente sa mga napatyag sang pinalangga sang kabuhi bangod lamang ginasuspetsuhan nga nagabaligya sang illegal nga droga.
Dugang pa sini nga sa Duterte Administration man nag-umpisa ang flood control corruption.
Gani panugyan sini sa mga Duterte nga maghinulsol, samtang si VP Sara ang dapat nga maghipos na lamang kun wala man sang maayo nga ihambal.
