BACOLOD CITY-Nagapatigayon na sang preemptive measures ang Vallacar Transit Incorporated agud malikawan ang paglaton sang 2019 novel coronavirus sa ila mga driver, konduktor, terminal personnel kag mga pasahero bilang pagsunod sa mando nga ginpagwa sang Land Transportation Franchising and Regulatory Board (LTFRB).
Sa interview sang Bombo Radyo Bacolod kay Jade Seballos, media relations officer sang VTI, ginpahayag sini nga pagtuhaw pa lang sang nCoV, nagpanghatag na sila sang face masks kag alcohol sa ila mga empleyado.
Nagpatigayon man sila sang orientation nahanungod sa proper hygiene.
Suno kay Seballos, antes magsaka ang mga pasahero sa mga bus, gina-sprayhan ang mga ini sang alcohol.
Antes man ipagwa ang mga bus units, ginasigurado nila nga matinlo ini kag na-sprayhan man sang alcohol.
Dugang pa sini nga ginamintinar gid nila ang katinlo sa mga terminal.
Ginpasalig naman ni Seballos ang riding public nga wala gid sang dapat ikabalaka bangud nagapatuman ang VTI sang preemptive measures santo sa mandato sang LTFRB.
