BACOLOD CITY — Nagpanindugan ang pamilya Prayco sa Barangay E. Lopez, Silay City nga makapila ka beses nag-ayo ang manugbata nga iloy nga si Remarie nga ipaidalom ini sa Ceasarean section bangud indi niya masarangan ang normal delivery sa kapid nga lapsag.
Sa panaysayon ni Elisa Prayco sa Bombo Radyo, Hunyo 28 pa sang hapon nag-ayo ang iya anak nga si Remarie nga ipaidalom ini sa CS bangud nagaluya na ini kag madugay na nakagwa ang panubigan.
Sa baylo, ginsabat ini sang midwife nga si Nieve Villalon nga indi mapatigayon ang CS bangud wala sila sang kwarta nga inugbayad.
Nagsabat si Prayco nga magabulig ang iya tiya sa galastuhan apang ginpahayag ni Villalon nga madugay pa magaabot ang kwarta rason nga hulaton lang sang iloy nga magagwa ini paagi sa normal delivery.
Suno sa lola sang kapid, naghulat kuntani sang referral nga sayluhon sila sa ospital sa Bacolod kun indi masarangan sang provincial hospital apang wala man sang desisyon ang medical staff.
Sang Hunyo 29, naghingyo sang pasaylo si Dr. Suelto kay Mrs. Prayco bangud sa nadangatan sang kapid apang ginpanindugan sini nga ginhimo sang mga doktor ang tanan nila nga masarangan agud masalbar ang bata.
Suno kay Nanay Elisa, ulihi nalang ginpahibalo si Remarie nga patay man ang ikaduha nga lapsag.
