Magabutang sang walk-trough metal scanner sa entrance sang mga eskwelahan sa ciudad sang Bacolod nga may dako nga student population.
Sa interview sang Bombo Radyo Bacolod kay Department of Education Division of Bacolod City Spokesperson Dr Lila Vaflor Arro, ini ang ila nga ginpropose sa Local School Board meeting.
Pahayag sini nga 21 ka walk-trough metal scanner ang iga-install sa high school samtang 19 naman sa elementary school.
Ang pagahamtangan amo ang mga buluthuan nga may masobra dos mil nga student population.
Apang kun ang eskwelahan ang may tatlo ka entrance, tatlo man ang pagabutangan sang walk-trough metal scanner.
Lakip man sa ginkonsiderar nga butang ang mga magagmay nga eskwelahan apang may mga record sang pag-ilinaway.
Tinutuyo sini nga mapadasig ang pagtsekyar sang mga bag sang estudyante sa pagsulod sa eskwelahan.
Matalupangdan nga tuman ka laba ang linya sang mga kabataan kada aga nga nagapasulod sa eskwelahan bangod sa maid-id nga inspection matapos sang mga serye sang bayolente nga krimen sa eskwelahan.
Ang malaba nga pila ang nagatuga naman sang pagkalate sang madamo nga estudyante.
Suno kay Arro, tanan nga eskwelahan ang may hand-held metal scanner naman nga ginagamit, samtang ginpropose naman nila kay Bacolod City Mayor Greg Gasataya ang pagprocure sang 291 ka dugang nga hand-held metal scanner.
