Wala pa mag-abot ang commitment order sang korte sa pagtransfer kay Police Staff Sgt. Bonifacio Saycon.
Sa interview sang Bombo Radyo Bacolod kay Negros Oriental Police Provincial Office (NORPPO) Spokesperson Police Captain Stephen Polinar, yara pa gihapon si Saycon sa Sibulan Municipal Police Station.
Ginahulat man sang mga ini ang commitment order, kun sa diin nga jail facility iga-remit ang suspect.
Si Saycon ang madumduman nga nakapatay sa Guest Relations Officer (GRO) nga si Chiela Mae Dinawanao sa isa ka bar, kag sunod sini nga ginpatay ang ila hepe nga si Police Captain Jose Edrohil Cimafranca kag sanday Police Senior Master Sgt Tristan Chua kag Patrolman Rey Albert Temblor.
Ang hepe ang tatlo lamang ka adlaw nga ginhaya antes ginlubong.
Samtang si Chua naman ang natalana nga ilubong sa Enero 19 kag si Temblor ang igalubong sa Enero 20.
Ang duha ang parehas nga hatagan sang full military honors sa ila funeral.
Sa karun wala pa sang may nabutang nga bag-o nga hepe sa Sibulan Municipal Police Station, apang nagpadala na sang dugang nga walo ka personnel nga gikan sa Regional Mobile Force Battalion Negros Island Region.
Nahibaluan nga luwas sa suspect kag tatlo ka pulis nga napatay, may duha pa ka pulis nga ginrelieve nga kaupod man nila sang mag-inom sa bar.
Sila ang magapatigayon pa sang assessment kun magakinahanglan pagid sang dugang nga augmentation para mapasangkad ang security sa nasambit nga police station.
