Estriktuhon sang Bacolod City Government ang waste management gikan sa mga pribado nga establishimento sa palibot sang Libertad Public Market.
Ini kasunod sang mga reklamo tuhoy sa kaangay nga wala nagakadula nga basura nga nagapalaw-ay sang imahen sang merkado.
Sa interview sang Bombo Radyo kay Bacolod City Administrator Atty Mark Steven Mayo, stable na kag consistent man ang garbage collection sang International Solid Waste Integrated Management Specialists, Inc. (ISWIM) partikular na sa mga merkado.
Ang Burgos Public Market ang makaduha nga ginahakot sang garbage trucks, isa sa aga kag isa sa hapon.
Samtang ang Bacolod Central Market kag Libertad Public Market ang tatlo ka beses naman nga ginabalikan, isa sa aga, isa sa hapon kag isa sa pagsirado na sang mga stalls sa gab-i.
Apang aminado si Mauo nga kaangay nga wala nagahubas ang basura sa Libertad Public Market.
Ini bangod madamo sang nagahaboy sang basura sa tion nga makalabay na ang mga garbage haulers.
Suno diri, sa masami, nagakahakot man ang basura gikan sa merkado, kag ang mga ulihi magpagwa sang ila nga mga basura amo ang mga pribado nga establishimento sa palibot sang merkado, kalakip na ang mga kalan-an.
Pahayag ni Mayo nga mangin estrikto ang Bacolod Environment and Natural Resources Office (BENRO) sa pagpatuman sang waste management sa area.
