Gin-release na sang Houthi movement ang video sang ila nga pag-atake sa coal carrier nga ginasakyan sang mga Filipino crew sa Red Sea sang Hunyo 12, kadungan sang pagkumpirmar nga naglugdang na subong ang barko.
Nakumpirmar sang Reuters nga MV Tutor ang barko nga makit-an sa video paagi sa design kag korte sang antenna kag deck sang barko nga nagsanto sa ila nga file images. Ang ngalan sa bow sang barko ang nagsanto man sa file images.
Ang Greek-owned nga MV Tutor ang ginpalukpan sang Houthi sang missile kag explosive-laden remote-controlled boat sang Hunyo 12 gani nabuslot ang kilid sini kag nasudlan sang tubig ang engine room.
21 nagikan sa 22 ka Filipino seafarers nga sakay sa MV Tutor ang narescue kag hilway sila nga nakabalik sa Pilipinas subong nga semana.
Si 2nd Engineer Nixon Asejo naman ang missing bangud natabuan nga yara ini sa engine room sang naglupok ang explosive-laden remote-controlled boat sa kilid sang barko.
Suno sa Department of Migrant Workers, naglugdang na ang MV Tutor gani nangin kumplikado ang search operations para kay Asejo.
Ang MV Tutor ang ikaduha na nga commercial vessel nga gintarget sang Houthis humalin sang bulan sang Nobyembre bilang ila nga pagsuporta sa mga Palestinians nga ginaatake sang Israel sa Gaza.
Ang Houthi movement, officially known bilang Ansar Allah, ang Shia Islamist political kag military organization nga nagtuhaw nagikan sa Yemen sang 1990s.
Sa kabug-usan, nagdangat na sa tatlo ang mga Filipino seafarers nga napatay bangud sa sea attacks sang Houthis.
Sang Marso subong nga tuig, duha ka mga seaman ang napatay sang nasunog ang engine room sang bulk carrier nga MV True Confidence sang naigo sang missile sang Houthi sa Gulf of Aden.
