Ginsapupo sang Barangay 18, Bacolod City ang mga manug-bantay sang ila pasyente sa ospital matapos nga wala na ang mga ini gintugutan nga makasulod sa Corazon Locsin Montelibano Memorial Regional Hospital agud malikawan ang community transmission sang COVID-19.
Sa interview sang Bombo Radyo Bacolod kay Punong Barangay Madeline Diaz, ginpahayag sini nga nakibot siya sang Sabado matapos nga mahibaluan ang kahimtangan sang mga manug-bantay sang ila pasyente sa ospital.
Suno diri, iya ginbutang ang iya kaugalingon sa sitwasyon sang mga watchers gani tuman nalang ang iya nga kasubo nga makita ang mga ini nga nagahigda sa salog sa sagwa sang ospital kag sa atubang sang iya nga barangay.
Gilayon nga ginmando ni Diaz nga mahatagan sang pagkaon kag face shield ang mga watchers sang Domingo sang kaagahon.
Nagbulig man ang grupo sang iya bata agud nga maka-donar sang pagkaon.
Magluwas sa pagkaon, naghatag man ang Barangay 18 sang mga pulungkuan, canopy kag carpet agud nga mahigdaan sang mga manug-bantay.
Ginbaralan naman sini ang gina-pwestuhan sang mga watchers kag ginpahamtangan pulis agud magbantay sang seguridad.
Suno sa punong barangay, bukas gid sila sa pag-amuma sa mga manug-bantay tubtob sa ila masarangan apang iya lang hugot nga ginapatuman ang istrikto nga pagsunod sa health protocols.
Nagapanawagan naman si Diaz sa mga local government units sang mga pasyente nga na-admit karon sa CLMMRH nga kuntani makapalab-ot sila sang bulig sa mga manug-bantay.
Kaangay na lamang suno sa iya sa alkalde sang Guihulngan City, Negros Oriental nga nag-arkila sang bilog nga apartment sa Barangay 18 agud matiniran sang iya mga residente nga may himata nga yara karon sa ospital.
Samtang, nagapati naman si Task Force Kasanag national commander John Chiong nga nabayolar sang pamunuan sang ospital ang humananitarian consideration.
Suno kay Chiong, dapat mapahibalo ang Department of Health angot sa kaangay sini nga sistema sa regional hospital.
Kinahanglan man suno sa iya nga makahatag sang paathag ang ospital angot sa natabo.
