BACOLOD CITY — Patigayunon na subong nga aga ang welcome ceremony para sa mga suldado nga halin sa Negros Occidental kag ginpadala sa Marawi City agud makig-away batok sa Maute terror group.
Nahibaluan nga gintalana kuntani ang programa sang tinalikdan nga Biyernes apang ginpaiway bangud wala si Governor Alfredo Marañon Jr.
Sa interview sang Bombo Radyo kay Col. Eliezer Losañes, commander sang 303rd Infantry Brigade sang Philippine Army, patigayunon ang programa sa Capitol grounds, alas 9:00 sa aga.
Magluwas sa paghatag sang pasidungog sa mga suldado nga nagpauli halin sa Marawi, may patigayunon man nga wreath-laying para sa mga Negrense nga suldado nga nagkalamatay samtang nagapakig-away batok sa mga terorista.
Suno kay Losañes, 80 ka mga suldado ang nakabalik na diri sa 303rd ID.
Ginalauman naman nga makabalik ang duha ka battalion sang militar sa idalom sang 3rd Infantry Spearhead Division.
