BACOLOD CITY — Nadugangan pa ang mga residente nagikan sa Marawi City nga nag-evacuate sa duha ka mga ciudad sa probinsya sang Negros Oriental bangud sa operasyon sang tropa sang gobyerno kontra sa Maute terror group.
Nahibaluan nga santo sa mapa, 290 kilometro lamang ang distansya sang Dumaguete City nagikan sa Marawi City.
Sa interview ng Bombo Radyo Bacolod kay Negros Oriental Governor Roel Degamo, naglab-ot na sa 80 ang mga Maranao nga nagdangop sa ila nga mga himata sa Dumaguete City kagTanjay City halin sang nakaligad nga semana.
Suno sa gobernador, gilayon nga ginbuligan sang Provincial Social Welfare and Development Office ang mga evacuees pinaagi sa paghatag sang food packs.
Nagpatigayon man ang PSWDO sang stress debriefing sa mga tigulang, mga kabataan kag mga nagabusong agud mabuligan ang mga ini nga malipatan ang trauma.
Ginkumpirmar man sang gobernador nga natapos na sang mga pulis ang profiling sa mga ini kag nakumpirmar suno sa iya nga indi sila miyembro ukon himata sang Maute terror group nga nag-atake sa Marawi City.
Ang mga evacuees ang naglabay sa Dipolog City kag nagsakay sa ro-ro vessel nga nagabiyahe padulong sa Dumaguete City.
Kadungan sini, nagpanawagan ang gobernador sa mga taga-Negros Oriental nga maghatag sang donasyon para sa mga pumuluyo sa Marawi City.
