Nasapwan nga patay bangod sa pagpangluthang kaina sang kaagahon ang witness sa shooting incident sa mag-utod nga Harold kag Harly Espina sang Setyembre tinalikdan nga tuig sa Prk Active, Brgy Mandalagan, Bacolod City.
Ang biktima ang ginkilala lamang nga si Alyas Kalbo, 22 anyos.
Sa interview sang Bombo Radyo Bacolod kay Police Lt Benjo Ballo Allo, officer in charge sang Bacolod Police Station 3, ang biktima ang may-igo sang bala sa ulo.
Ini ang ginaalegar ginluthang alas-12:15 sang kaagahon, apang pasado ala-1:00 sang kaagahon na sang nareport sa kapulisan.
Wala naman sang kabuhi ang biktima sang maabtan sang mga pulis, gani gincordon na lamang gilayon ang area.
Sa karun lakip sa ginatutukan nila nga motibo ang nahanungod sa pagwitness sini sa krimen sang Setyembre 29, 2026 kun sa diin gintiro ang mag-utod nga Harold kag Harly Espina sang riding in tandem suspect.
Dead on the spot sadto si Harold samtang nag-agom man sang igo sang bala si Harly, nga nahimo nga matabangan.
Suno kay Ballo Allo, isa sa duha ka mga suspect ang nadakpan na, apang ang isa ang nagapabilin nga at large.
Luwas diri, may impormasyon man ang kapulisan nga drug user man ang biktima.
Sa karun wala pa sila sang person of interest sa kaso, apang nagapadayun ang imbestigasyon.
