Patay ang isa ka lalaki samtang pilason ang apat ka iban pa sang makabunggo ang isa ka pribado nga salakyan sa balay sa banwa sang Cauayan, Martes sang hapon.
Ginkilala ang napatay nga si Noe Degilllo sang Purok 1, Brgy. Bulata, Cauayan nga amo ang driver sang Mitsubishi Strada nga nagbunggo sa puno sang paho nga nagderetso sa balay ni Allan Margarce.
Samtang ginkilala naman ang pilason nga upod sini sa salakyan nga sanday Kent Elardo, 59-anyos; Mark Ebarat, 42; Rogelio Degillo, 60; Noela Mae Degillo, 5, nga estudyante sang University of Negros Occidental Recoletos (UNO-R).
Lunsay residente ang mga biktima sang Purok 1, Brgy. Bulata.
Suno kay Police Major Lowell Garinganao, hepe sang Cauayan Municipal Police Station, gikan sa ciudad sang Sipalay ang mga biktima kag madasig ang pagpadalagan sang salakyan ni Noe kag ini ang nagbunggo sa balay ni Magarce.
Naguwa man sa imbestigasyon nga nakainom sang makahulubog nga ilimnon ang driver.
Dead on-arrival sa Mercidetas J. Montilla District Hospital sa Sipalay City si Noe samtang indi naman malala nga kapilasan ang naangkun sang iya mga kaupdanan.
