12 tanan ka mga board of directors kag duha ka former General Manager sang Negros Occidental Electric Cooperative (NOCECO) ang imbulbado sa improper disbursements sa sulod sang electric cooperative.
Suno kay National Electrification Administration (NEA) administrator Antonio Mariano Almeda, nagpatigayon sang Comprehensive Operations Audit ang NEA EC-Audit Department (NEA-ECAD) sa operations sang NOCECO humalin sang Agosto 1, 2019 tubtob Abril 30,2023 kag nakit-an sa Audit Report ang improper disbursements bangod sa nagasololobra nga allowances nga ginabaton sang 14 ka mga opisyales nga wala sang approval sang NEA.
Gin-endorse sang NEA-ECAD ang findings sini sa NEA Administrative Committee NEA-ADCOM kag amo na nga nag-conduct sang Motu Proprio investigation.
Nahibaluan nga imbulbado diri ang duha ka former manager nga sanday Jonas F. Discaya kag Engr. Ray V. Bustamante; kag ang 14 ka mga board of directors nga ginalakipan sanday Richard A. Benedicto, Raymundo A. Tongson Jr, Reynaldo G. Bedaure Jr, Eduardo Benjamin A. Alonso, Rolito E. Espinosa, John Peter Z. Millan, Elbert L. Magbato, Rey Ronald E. Cabalde, Edmund P. Arceo, Ma. Rama Espinosa, Allan Paul Mirasol, kag ang nagtaliwan na nga si Jose Emeric Jabagat.
Nagdangat sa P65,534,504.20 nga allowances kag benefits ang nabaton sang 12 ka board of directors nga wala sang approval sang NEA.
Samtang, P20,128,907.28 naman ang nabaton ni Former general manager Discaya gikan sa improper increase sa iya nga sweldo, excess gratuity pay, travel expenses kag iban pa nga benefits.
P2,127,111.00 naman ang nabaton ni former manager Engr. Bustamante gikan improper increase sa iya nga sweldo kag unwarranted benefits.
Abril 18, 2024, nag-issue ang NEA Board of Administrators sang desisyon nga pagkakas sa trabaho sang mga opisyales nga imbulbado, kag disqualification sa reinstatement ukon reemployment sa bisan diin nga electric cooperative kag disqualification sa pagpadalagan sa bisan ano nga posisyon sa electric cooperative kag pagkadula sang ila monetary benefits.
