Nagdangat sa indi magnubo 120 ka mga tawo, nga kalabanan kapulisan, ang nasamaran sa nagaluntad nga anti-government protests sa Mexico kahapon.
Ang rally ang gin-organisar sang Gen Z youth groups, nga nagpanawagan sang suporta gikan sa mga pumuluyo.
Ang mga ini ang nagmartsa sa palibot sang Mexico City agud magprotesta batok sa drug violence kag security policies ni Mexican President Claudia Sheinbaum.
Apisar nga ginapahayag nga nagapabilin sa 70 percent ang approval ratings sang Presidente, naghatag sang kahangawa sa publiko ang pila ka mga pagpatay sang mga high-profile personalities.
Kalakip diri ang assassination sang nakaligad nga sinemana kay Uruapan Mayor Carlos Manzo, nga nagapanawagan sang mas mabaskog nga tikang batok sa mga cartels.
Nagapati si Sheinbaum, nga ang mga pagprotesta nga nagaluntad sa nagkalainlain nga ciudad, ang ginapondohan sang right-wing politicians nga kontra sa gobyerno.
