Handa na ang Barangay 1 sa pagpartisipar sa Electric Masskara Competition nga patigayunon sa Megaworld Upper East padulong sa Bacolod City Government Center karon sa gab-i.
Sa interview sang Bombo Radyo kay Punong Barangay Cesar Rellos Jr, malip-ot lang ang tiyempo nila sa pag-ensayo kag paghimo sang float bangud nagligad nga bulan ini ginsuguran.
Sekreto ang paghimo sang ila nga float nga may ara sang tema nga “Balik Yuhum”, kasubong man nga wala sang mga pictures kag videos ang dress rehearsal nila kagab-i, para wala sang may makasunod sang ila nga estilo.
Ginakabig niya nga maayo kun maplastar na ang mga float para wala na sang makatandog kag makasunod.
Sa bahin naman sang mga performers, may ara sang limitasyon sa edad sang mga dancers kun sa diin nagpatigayon sila sang audition sa ila barangay sa pagpili sa mga participants.
May ara sang kabilogan nga P300,000 assistance nga ginhatag sa barangay, apang P180,000 ang natalana nga budget sang Barangay 1 para sa Masskara float kag P120,000 naman sa mga dancers kag choreographer.
Sa 13 ka mga barangay nga magapartisipar, isa ka music lamang ang ila pagasautan nga pakitaan nila sang ila mga kaniya-kaniya nga estilo.
Gani ginapanawagan ni Rellos sa mga residente sang Barangay 1 nga saksihan ang Electric MassKara competition bilang suporta kag inspirasyon sa ila mga performers.
