Padayon nga ginabulong ang Grade 8 student nga ginbuno sang Grade 7 student sa gwa sang Sum-ag National High School, Bacolod City, kahapon, alas- 4:18 sang hapon.
Ang biktima ang naga-edad sang 14 samtang ang suspect naman naga-edad sang 12.
Sa interview sang Bombo Radyo kay Police Capt Greeky Cayao, station commander sang Bacolod Police Station 9, may nagluntad nga komosyon sa gwa sang eskwelahan kag sa tunga sang kinagamo may napudyot ang suspek nga matalom nga butang nga gingamit sini buno sa biktima.
Nag-agom sang igo sa nawala nga kamot kag nawala nga bahin sang lawas ang biktima samtang gilayon naman nga nalagyo ang suspek bangod sa kakulba.
Suno kay Cayao, indi gid man patal ang pilas sang biktima kag nahimo pa sini magpadulong sa police station apang gin-abisohan ini nga magpadulong sa ospital.
Samtang, boluntrayo naman nga nagsungka ang suspek sa kapulisan kun sa diin gin-updan ini sang iya magulang apang wala narekober ang gingamit sini nga bladed weapon sa rason nga iya ini ginhaboy matapos ang krimen tuga sa kakulba.
Pahayag ni Cayao, nagapaayo pa ang biktima samtang ang suspek ginturn over na sa Department of Social Welfare and Development (DSWD). Samtang, ginalantaw nga sinuyaay ang rason sa nagluntad nga komosyon sa gwa sang Sum-ag National High School sa Bacolod City kun sa diin nabun-an ang 14- anyos nga biktima kag ang suspek naga-edad sang 12.
Sa interview sang Bombo Radyo kay punong barangay Rodney Carmona sang barangay Sum-ag, madugay na nga problema sa lugar ang paghinangkatanay sang mga kabataan bangod madamo sang grupo-grupo sang mga bata sa lugar.
Suno diri, nagrason ang suspek nga gin-unahan siya sumbag sang biktima kag nagbalos lamang ini.
Suno kay Carmona, may yara sang mga barangay tanod kag kapulisan nga nagalibot-libot sa lugar apang sang natabo ang kinagamo, yara sa pihak nga area nagapatrolya ang otoridad.
May yara sang patigayonon nga meeting ang punong barangay kaupod ang school principal tuhoy sa safety sang kabataan.
Nagpanugyan si Carmona sa mga ginikanan nga dapat umpisahan ang pagdisiplina sa mga kabataan sa sulod sang panimalay agud mapalayo ang mga ini sa tinonto.
