Pilason ang 14 anyos nga solterito matapos ginluthang sang duha ka suspect sa Prk Masagana, Brgy 6, Bacolod City alas-11:40 kagab-i.
Ang mga suspect ang ginkilala lamang nga sanday Alyas Bugrong kag Alyas Jun-Jun, lunsay residente sang Prk Kabuhi, Brgy 10, Bacolod City.
Sa inisyal nga imbestigasyon sang kapulisan, ang biktima kag abyan sini ang nagapungko sa kilid sang dalan, sang hinali na lamang nagdulog sa ila atubang ang duag blue kag itom nga Honda Beat nga motorsiklo nga wala sang plaka.
Ang driver amo si Alyas Jun-Jun, samtang angkas naman sini si Alyas Bugrong, nga hinali nga naghunos sang wala matumod nga armas luthang kag gintiro ang biktima.
Ang biktima ang nag-agom sang igo sang bala sa nawala nga batiis.
Nahimo man sini nga makapalagyo kag nagpangayo sang bulig sa iya tiyo, nga nagdala sa iya sa Corazon Locsin Montelibano Memorial Regional Hospital para sa nagakaigo nga pagbulong.
Wala naman sang narecover nga empty shell ukon fired cartridge sa crime scene.
Sa karun padayun pa ang hot pursuit operation sang kapulisan batok sa suspetsado.
