Nagapangayo sang bulig ang isa ka 16-anyos nga iloy kag pamilya sini sa Ilog, Negros Occidental matapos nga magbata sang triplets sang nakaligad nga mga inadlaw sa ospital sa Kabankalang City, Negros Occidental.
Sa interview sang Bombo Radyo Bacolod sa amay nga si Alvin Lales sang Barangay Canlamay, Ilog, Negros Occidental, ginpahayag sini nga ginamonitor nila sa karon ang sugar level sang tatlo ka mga lalaki nga lapsag bangud 7 months pa lang ang mga ini sang ginbun-ag sang iloy nga si Shiena Abela sadtong Mayo 16 paagi sa ceasarean section.
Ginpangalanan ang tatlo nga sanday Alex, Zander kag Alexander.
Suno sa 22-anyos nga amay, ginamonitor sang mga doktor sa Lorenzo Zayco District Hospital sa Kabankalan City ang kahimtangan sang mga lapsag apang ginarekomendar ang mga ini nga ipalantaw ang triplets sa eksperto sa private hospital.
Aminado si Lales nga wala sila sang ikasarang para sa check-up bangud pagpanguma ang ila nga palangitan-an samtang wala naman sang trabaho si Shiena.
Nahibaluan nga ang menor-de-edad nga iloy ang ikawalo sa siyam ka mag-ulutod kag pagpanguma man ang palangitan-an sang iya mga ginikanan.
Matapos nabatian sa Kahapon Lamang Program sang Bombo Radyo Bacolod ang istorya sang triplets, pila ka mga tagpalamati ang nagbisita sa istasyon agud magpalab-ot sang bulig sa maglive-in partner.
