Preparado na ang Negros Occidental Police Provincial Office (NOCPPO) kasubong man ang ila nga security plan para sa Undas 2026.
Sa interview kay Police Major Judesses Catalogo, Spokesperson sang NOCPPO, localized ang ila nga set-up kun sa diin ang Chief of Police sang kada lugar ang ginmanduan nga magpatuman sang safety and order sa ila tagsa ka patyo kag columbarium.
Libuton naman ni Provincial Director Police Col. Dennis Wenceslao, ang nagkalain-lain nga areas agud tsekyaron ang ginpatuman nga security.
Suno kay Catalago, duha ukon apat ka mga pulis ang iga-deploy sa tagsa ka patyo apang depende ina sa kalaparon sang area.
Ginpatpat naman Catalogo ang mga ginadumilihan sa pag-obserba sang Undas, kalakip na diri ang pagdala sang mga patalom, pag-inom sang makahulubog nga ilimnon, pagpanahor, kag pagpatukar sang makusog nga mga tunog.
Ang deployment ang natalana nga mag-umpisa sa Oktubre 31 tubtob Nobyembre 2.
