BACOLOD CITY – 17 ka mga menor de edad nga gin-alegar mga Maranao ang na-rescue sang mga otoridad sa paktoryahan sang peke nga sigarilyo sa Barangay Bata, ciudad sang Bacolod kaina.
Ang malapad nga compound ang gin-alegar ginaarkilahan ni a certain Jimmy nga isa ka Chinese kun sa diin gina-repack ang mga peke nga sigarilyo sang duha ka sikat nga brand.
Sa exclusive interview sang Bombo Radyo kay Bacolod City Police Office Director Police Senior Supt. Jack Wanky, ginkumpirmar sini nga ang 17 ka mga menor de edad, nagapang-edaron sang 12 tubtob 17, ang gikan sa banwa sang Balo-i, isa ka banwa sa dulunan sang mga ciudad sang Marawi kag Iligan, sa probinsiya sang Lanao del Norte.
Ginpahayag nga naapektuhan ang mga ini sang kinagamo sa Marawi rason nga naengganyo magtrabaho sa ciudad sang Bacolod bilang mga empleyado sang isa ka paktoryahan sang electronics apang lain ang ila nadangatan pag-abot diri.
Suno kay Wanky, ginsaysay sang mga biktima nga luyag na kuntani nila magpauli apang indi sila pagpahanugutan bangud suno sa tag-iya, wala pa makabayad ang ila serbisyo sa gingasto sa ila pamasahe padulong diri.
Na-recover sa crime scene ang kapin 200 ka dalagku nga karton sang peke nga sigarilyo, mga peke nga selyo sang duha ka cigarette brands kag ginabanta 500 tubtob 600 gramos sang ginapatihan marijuana.
Ginsulod man sang kapulisan ang isa pa gid ka propyedad nga ginaarkilahan man ni a certain Jimmy apang wala pa makapaguwa sang impormasyon tuhoy sa recoveries.
Nag-upod sa operasyon ang BCPO, Bureau of Internal Revenue (BIR), Philippine Drug Enforcement Agency (PDEA), kag City Social Welfare and Development (CSWD).
