Patay ang isa ka lalaki nga nagabisikleta matapos aksidente nga makabunggo sa nagaparada nga de pampasahero nga jeep sa Barangay Zone 15, Talisay City, Negros Occidental, pasado alas-8:00 kagab-i, Pebrero 8.
Ang biktima ang 18-anyos nga lalaki nga residente sang Canlaon City, Negros Oriental.
Sa interview sang Bombo Radyo kay William Cordova, guard nga nakawitness sa natabo nga aksidente, pasado alas-8:00 kagab-i, nabatian sini ang makusog nga paglagapok kag sa pag-usisa, nakita sini ang biktima nga nagaligid na sa kilid sang jeep apang nagahulag pa.
Apang, pag-abot sang rescue team, gindeklarar nga wala na sang kabuhi ang biktima.
Ginalantaw nga madasig ang pagpadalagan sang biktima kag makusog ang impact sa pagkabunggo sini sa jeep nga nagresulta sang iya kamatayon.
Suno naman kay Willie Rodriguez, driver sang jeep, naguba ang makina sang iya nga jeep rason nga ini ang ginpahigad anay niya sa kilid dalan kag mangayo kuntani sang bulig.
Dugang pa sini, wala siya nakabutang sang Hazard Warning Sign sa iya nga jeep bangud nagahingagaw siya nga mangayo sang bulig bangud nagainulan.
Pagbalik ni Rodriguez sa lugar sang aksidente, didto na niya natukiban nga ginbawian na sang kabuhi ang biktima matapos ang aksidente.
