Ginpanginwala sang manunudlo sa Mansilingan Agro-Industrial High School sa ciudad sang Bacolod ang reklamo batok sa iya sa alegasyon nga gintampa sini sang sapatos ang 14 anyos nga grade 7 student.
Sa Ipa-Bombo segment sang Bombo Radyo Bacolod, nagreklamo ang iloy nga si Kimberly Salazar sa alegasyon nga gintampa ang bata niya nga si Kent sang ila manunudlo nga si Verna Marfil Escanilla.
Samtang, sa interview kay Verna Marfil Escanilla, hugot ini nga nagapanindugan nga wala niya ginsakit ang bata.
Ginpahayag sini ang natabo nga gintawag niya ang bata kag ginkuha ang sapatos sang estudyante kag gingamit tudlo sa iya guya samtang ginapamangkot kun ayhan ihampak sini sa iya ang sapatos kun bala makabatyag man ini sang sakit.
Suno kay Escanilla, ginapaidalom man sa medico legal ang bata apang wala man sang may nakita nga trace nga naka-agi sakit ang bata.
Suno diri, ginadisiplina sini ang estudyante para indi na maliwat ang insidente matapos nga nakita sini ang message sang bata nga makabig na nga alarming kag ang pagpanumbag sang bata sa iya classmate kaangay nga makabig nga indi na normal kag pagpangbully na.
Dugang pa sini, dapat indi magfocus sa iya ang mga ginikanan kag hatagan sang atensyon ang bata kun ngaa nahimo sini ang pagpanumbag sa iban.
Pa-athag ni Escanilla, naka-intindi ini nga indi mahimo sakiton sang manunudlo ang bata kag sang nagluntad ang insidente, yara siya sa insakto nga paminsaron.
Pahayag sini, istrikta man ang panulok sa iya sang iban nga estudyante apang sa 29 ka tuig nga pagtrabaho niya bilang manunudlo, wala natabo nga nanakit ini sang bata.
