Nadakpan na sang mga kapulisan kahapon ang suspect sa pagpanghold up sa isa ka estudyante sang Enero 15 sa Barangay Mansilingan, Bacolod City.
Sa interview sang Bombo Radyo kay Police Captain Jay-r Reyes, Officer in Charge sang Bacolod Police Station 7, ginkilala ang biktima nga si alyas “Aiyana”, 19 anyos, residente sang Block 12 Lot 8, Simon Peter Village, Brgy. Mansilingan, Bacolod City samtang ang suspek naman ang ginkilala nga si alyas Bench, 18 anyos, residente sang Prk Paghidaet, Brgy Tangub, Bacolod City.
Suno kay Reyes, nadakpan si alyas “Bench’ kahapon sa ginpatigayon nga manhunt operation sang kapulisan.
Suno diri, na-locate nila ang puluy-an sang suspect kag gilayon nila ini nga ginpadulongan apang wala nila naabtan ang suspect sa ila nga puluy-an gani gin-istorya nila ang iloy sini nga gilayon magpahibalo sa kapulisan kun ini ang nakapauli na.
Pahayag ni Reyes nga gilayon man nga nag-text ang iloy sang nakapauli ang iya bata rason nga nadakpan si alyas “Bench”.
Subong nga adlaw, pasakaan na sang kaso nga robbery ang suspect.
Nahibaluan nga positibo nga natumod sang biktima si alyas “Bench” nga suspect sang ginpalantaw sa iya ang rogues gallery.
Mensahe ni Reyes sa publiko ilabi na sa mga kabataan nga maghalong kag indi maglakat nga naga-isahanon ilabi na sa madulom nga mga lugar.
