Wala pa gihapon makilal-an ang lalaki nga nasapwan patay sa Brgy Alijis, Bacolod City kaina kapin alas-6:00 sang aga.
Sa interview sang Bombo Radyo Bacolod kay Benedick Isidro, chief tanod sang Brgy Alijis, sila ang nagroving pa alas-4:00 sang kaagahon, kag wala makit-an ang bangkay.
Gani wala sini ginadula ang posibilidad nga ginhal-id lamang sa area ang biktima.
Ini ang nasapwan nga nagahapa kag nakasuksok lamang sang blue nga boxer shorts, samtang ang iya nga kamot ang naka-ipit naman sa iya nga tiyan.
Nakitaan sang pilas sa liog ang biktima samtang pak-ad man ang panit sa iya nga batiis.
Ini ang ginabanta nga yara sa 17 tubtob 20 anyos.
Nahibaluan nga madulom ang bahin kun sa diin ginbilin ang bangkay.
Wala naman sang nakakilala sa biktima, gani ginapatihan nga ini ang indi residente sa Brgy Alijis.
Sa karun padayun ang imbestigasyon sang Bacolod Police Station 9 sa kaso.
May-ara man sang persona nga nagtsekyar kun iya nga bata nga wala pa makapauli sang maglakat alas-10:00 kagab-i ang biktima, apang ini ang negatibo.
Panugyan naman sang Bacolod Police Station 9 sa mga may wala pa makapauli nga himata, nga magkoordinar lamang sa ila sa pag-identify sang bangkay.
