18 ka mga personnel sang Bacolod City Police Office ang natigayon nga makuhaan sang dugo sa bloodletting program nga ginhiwat sa headquarters sang BCPO kahapon sang aga.
Sa interview sang Bombo Radyo kay BCPO Spokesperson Police Lt. Liberty Indiape, ginpahayag sini nga madamo nga mga personnel ang nakigbahin sa screening sang mga magadonar sang dugo apang 18 lang ang nakapasar.
Suno kay Indiape, kabug-usan nga 8,100 CC sang dugo ang ila natipon.
Suno sa iya, ini ang labing una nga blood donation activity nga ginhiwat sini nga quarter bangud sang tinalikdan nga tuig, nauntat ini tuga sang pandemic.
Ang nasambit nga aktibidad ang may tema nga “Dugo Mo, Kabuhi Ko” kag ginpangunahan sang City Community Affairs and Development Unit sang BCPO in partnership with Negros First Provincial Blood Center kag ginpatigayon sang Negros Occidental Provincial Health Office.
