Magapangatubang sang kaso nga paglapas sa Republic Act 10591 ukon Comprehensive Firearms and Ammunition Regulation Act kag Illegal Discharge of Firearm ang 19-anyos nga lalaki matapos nadakpan nga ginaalegar naglagas kag nagpaarak sang luthang sa isa ka ceres bus sa National Highway sang Crossing Cristobal, Barangay Mabini, Escalante City sang Hulyo 30.
Sa impormasyon nga nakuha sang Bombo Radyo, nakabaton sang tawag ang Escalante City Police Station nagikan sa platoon leader sang 3rd Maneuver Platoon sang First Negros Occidental Provincial Mobile Force Company nga nagapangayo sang police assistance ang konduktor sang ceres bus nga ginkilala lamang kay Mark, bangud sila ang ginalagas sang lima ka mga persona sakay sa ila motorsiklo kag ginpaarakan sang luthang.
Suno diri, ginparahan ang ceres bus sang mga suspetsado apang wala nagpundo ang driver gani ila ini ginlagas.
Matapos nagreport ang konduktor, nagpatigayon sang joint pursuit operation ang Escalante City Police Station kag 3rd Maneuver Platoon sang First Negros Occidental Provincial Mobile Force Company kag ila natigayon nga nadakpan si Joefel Sante, 19-anyos, residente sang Purok Makiangayon 2, Echarri Street, Barangay Balintawak, Escalante City.
Nakapalagyo naman ang iban sini nga kaupdanan.
Narecover sa iya paghinakop ang isa ka caliber 357 magnum revolver nga may apat ka mga bala kag isa ka fired cartridge sa cylinder sini, isa ka unit sang motorsiklo kag isa ka sling bag.
Sa karun nakahunong na si Sante sa Escalante City Police Station kag magapangatubang sang kaso.
