19 ka mga banwa kag ciudad sa Negros Occidental ang nakabatun sang high frequency radio nga may direct satellite link nga magamit sang Disaster Risk Reduction and Management Offices.
Ang mga equipment ang ginpanagtag sa ginpatigayon nga Provincial Development Council meeting sa Negros Residences.
Ginpahayag ni Negros Occidental Governor Eugenio Jose “Bong” Lacson nga P7 million ang budget kun sa diin dala na ang radyo kag antenna.
May-ara man sang itukod nga tatlo ka repeaters sites para sa mas mahapos nga komunikasyon.
Pasalig ni Lacson nga tanan nga local government units ang hatagan, apang 19 pa lamang ang nakakumpleto sang requirements.
Lakip sa mga nahatagan ang Bago City, Escalante City, Himamaylan City, Sagay City, San Carlos City, Sipalay City, Binalbagan, Calatrava, Salvador Benedicto, EB Magalona, Hinobaan, Ilog, Isabela, La Castellana, Manapla, Moises Padilla, Murcia, Pontevedra kag Toboso.
Ginpasalamatan naman sang mga LGUs ang nabatun nga equipments.
Madumduman nga isa sa nangin problema sa nakaligad nga halin sang Bagyo TINO ang kabudlayan sang komunikasyon.
Ini matapos mabagsak ang mga communication lines, kag may kabudlayan man sa pagbyahe bangod sa mga road obstructions.
Paagi sa direct satellite link, mas mangin mahapos na ang pagpalab;-ot sang mga LGUs sang datos kag impormasyon.
Ang provincial government ang nagatrain naman sang mangin Emergency Medical Team para sa kada LGUs.
