BACOLOD CITY — Pila ka mga medalya ang buena mano nga natipon sang Negros Occidental kadungan sang una nga adlaw sang hinampang sa Western Visayas Regional Athletic Association (WVRAA) Meet sa ciudad sang Iloilo.
Sa interview sang Bombo Radyo, ginpahayag ni Coach Addy Arca sang athletics secondary girls nga nakuha ni Jamela de Asis ang bulawan nga medalya sa shot put matapos nga nakahaboy sang 11.76 meters.
Bronze medalist man sa shot put secondary girls si Ann Katherine Quitoy nga nakahaboy sang 10 meters.
Samtang, silver medalist naman si Judifer Caranzo sa high jump secondary boys.
Bangud sini, sigurado na ang pagsaka ni de Asis sa Palarong Pambansa 2018.
Antes matapos ang una nga adlaw sang hinampang, nadugangan pa ang gold medals sang Negros Occidental.
Kahapon, nakuha ni Irex Villanueva ang gold sa Shut Put elementary Boys, duha ma ka gold ang nakuha ni Alyza Chavez sa Women Athletics Gymnastics (WAG) elementary girls sa bahin sang floor kag vault exercises.
Gold medalist man si Carmel Buhat sa 8-ball billiard secondary girls.
Nakuha man ni Christian James Magbanua ang bulawan sa individual single weapon sa Arnis Boys elementary kag siya man ang silver medalist sa individual sword and daggers.
Gold medalist man si Julian Marie Oberes sa individual single weapon sa Arnis Elementary girls kag silver medalist man ini sa individual double weapon.
