Nagapadayon karun ang imbestigasyon sang Bacolod Police Station 7 sa kaso sang pagpatay kay Richard Tutop nga una gin-abduct sa guwa sang ila puluy-an sa Purok Seresa South, Brgy. 3, Miyerkules sang gab-i.
Madumduman nga kahapon sang kaagahon sang nasapwan na lamang ang bangkay sang biktima nga may igo na sang bala sa ulo kag nakagapos sa guwa sang East Homes 6 Subdivision, Brgy. Mansilingan.
Sa interview sang Bombo Radyo Bacolod kay Police Major Carmelo Nermal, commander sang Police Station 7, gina-tsekryar pa nila karun kun may yara sang CCTV cameras sa palibot kun sa diin nasapwan ang bangkay ni Tutop.
Padayon man nga nagapangita sang mga testigo sa krimen ang nasambit nga police station. Samtang,
Duha ka mga motibo ang ginatutukan karon sang kapulisan may kaangtanan sa pag-abduct kag pagpatay kay Richard Tutop sang Purok Seresa South, Barangay 3 ciudad sang Bacolod.
Madumduman nga gin-abduct si Tutop sa nasambit nga lugar sang Enero 22 kag nasapwan na lamang ini nga patay sa atubang sang East Homes 6 Subdivision, Barangay Mansilingan kahapon sang kaagahon.
Sa interview sang Bombo Radyo Bacolod kay Bacolod City Police Office spokesperson P/Lt.Col. Ariel Pico, ginpahayag sini nga ginatutukan karon sang kapulisan nga anggulo sa kamatayon ni Tutop amo ang kaangtanan sini sa iligal nga druga kag posible man nga may yara ini sang personal nga kaaway.
Nahibaluan nga ang biktima ang napriso sang 2017 bangud sa pagbayolar sang RA 9165 kag naka-avail lamang ini sang plea bargaining agreement sang Oktubre 2019.
Dugang pa ni Pico, may yara naman sila sang persons of interest apang indi pa ini nila sa karon mapalayag.
Lauman naman subong nga aga ang resulta sang autopsy kag ang findings sang Scene of the Crime Operatives.
Samtang, luyag naman maistorya ni Bacolod City Mayor Evelio “Bing” Leonardia si BCPO director P/Col. Henry Biñas agud mabatian mismo nagikan sa city director nga kun may kaangtanan sa iligal nga druga ang kamatayon ni Tutop.
Suno sa alkalde, luyag sini patutukan sa kapulisan ang serye sang pagpamatay sa ciudad.
Madumduman nga nasapwan ang bangkay ni Tutop nga nakabaklid ang kamot gamit ang packing tape kag may busal man ang baba sini.
Ginapasuni nga gintiro sa likod nga bahin sang ulo ang biktima nga gintunaan sang iya gilayon nga kamatayon.
Narekober sa crime scene ang lima ka empty shells sang .45 caliber pistol kag isa ka deformed slug nga nakit-an sa sulod sang baba ni Tutop.
