Duha ka miyembro sang New People’s Army patay sa engkwentro nga nagluntad sa Brgy. Sandayao kag Brgy. Binobohan, Guihulngan City, Negros Oriental sa tunga sang 47th Infantry Battalion kag 3rd Infantry Division sang Philippine Army kag NPA, kahapon.
Sa interview sang Bombo Radyo kay Lt Col Dennis Martinez, commander sang 47th IB, lalaki kag babayi ang duha ka napatay nga lunsay mga residente sang nasambit nga ciudad.
Suno diri, nagreport ang mga residente sang Brgy. Sandayao kag Brgy. Binobohan angot sa presensya sang mga NPA sa area.
Sa pagresponde sang militar, napatay ang duha ka NPA kag narekober ang isa ka M16 rifle, apat ka long magazine, isa ka caliber .45 pistol, isa ka hand grenade kag mga subersibo nga dokumento.
Ang mga napatay nga miyembro sang NPA nahibaloan nga miyembro sang Central Negros 1.
Mensahe ni Martinez sa mga remnants sang NPA nga manaog na kag magbalik sa sabak sang gobyerno para sa matawhay nga pagpangabuhi.
