Natumod na ang duha ka mga suldado nga miyembro sang 94th Infantry Battalion, 3rd Infantry Division sang Philippine Army nga ginbawian sang kabuhi kasunod sang ikaapat nga engkwentro batok sa rebeldeng New People’s Army (NPA) sa Sitio Sig-ang, Brgy. Carabalan, Himamaylan City, Negros Occidental sang Oktubre 8.
Sa interview sang Bombo Radyo Bacolod kay Brigadier General Inocencio Pasaporte, commander sang 303rd Infantry Brigade sang Philippine Army, ang mga napatay ang ginkilala nga sanday Corporal Christian P. Drilon, tumandok sang San Enrique, Iloilo, kag Corporal Rex G. Verde, nagikan sa probinsya sang Guimaras samtang ang anum ka mga nasamaran ang ginkilala nga sanday Corporal Joey Gardose, Private First Class (PFC) Rolly Rama, Private First Class June Fuentes, Private First Class Wilson Liander Jr., Private Wilchor Recaña kag Sergeant Edgiel Ucag.
Ginpadulungan man ni Pasaporte ang mga nasamaran nga mga suldado agud kamustahon ang sitwasyon sang mga ini.
Suno pa diri, ginbisita man nanday Under Secretary Jose Faustino Jr sang Department of National Defense agud nga mahatag ang Wounded Personnel Medal (WPM) sa mga nasamaran nga suldado kaupod sanday Lt. General Bartolome Vicente Bacarro Philippine Army, Chief Of Staff sang AFP; Lt. General Romeo S. Brawner Jr., Commanding General sang Phil Army; Major General Benedict M. Arevalo, Commander sang 3rd Infantry Division sang Philippine Army.
Suno kay Pasaporte, wala pa nakabalik ang mga residente nga nag-evacuate bangud nagapadayon pa ang ila clearing operations.
Suno diri, clear naman ang lugar apang ginasiguro lamang sang mga ini nga wala na sang presensya sang mga rebelde sa lugar bangud indi man nila luyag nga mabutang sa alang-alang ang seguridad sang mga pumuluyo sa tion nga magbalik na ang mga ini sa ila tagsa ka puluy-an.
Nagpasalig man ini nga padayunon nila ang pagtuman sang ila mandato nga mangin malinong kag matawhay ang syudad sang Himamaylan apisar pa sang nalagas nga mga tropa.
