Nalakip ang duha ka bulan nga lapsag sa 13 ka kompirmado nga mga kaso sang COVID-19 nga narekord sa Negros Occidental kahapon kag siya ang youngest COVID positive sa probinsya.
Sa COVID-19 Case Bulletin No. 98 nga ginpagwa sang Department of Health Region 6, lunsay mga locally stranded individuals (LSI) ang dugang nga mga kaso.
Ini ang ginalakipan sang 21 anyos nga babaye nga taga Himamaylan; 33 anyos nga babaye, residente sang Calatrava; 57 anyos nga babaye nga residente sang Himamaylan; 53 anyos nga lalaki nga tumandok sang Sagay; 22 anyos nga lalaki nga taga Escalante; 26 anyos nga babaye nga residente man sang ciudad sang Escalante; 28 anyos nga babaye, residente sa Cadiz City; 14 anyos nga babaye nga tumandok sang Sagay City; 50 anyos nga lalaki nagikan sa Cauayan; 64 anyos nga lalaki nga taga-Escalante; 52 anyos nga babaye nagikan sa Hinobaan; 66 anyos nga babaye nga tumandok sang Cadiz City; kag duha ka bulan nga lapsag nga lalaki nga residente sang Moises Padilla.
Sa karun, may yara na sang 47 ka mga positibo nga kaso sang COVID-19 sa ciudad sang Bacolod samtang 104 naman sa Negros Occidental.
Samtang, wala naman sang may nagdugang nga COVID case sa ciudad sang Bacolod.
SA KAANGOT NGA BALITA, Yara sa maayo nga kahimtangan ang duha ka bulan nga lapsag nga lalaki nga nagpositibo sa coronavirus disease 2019 (COVID-19) sa Moises Padilla.
Sa interview sang Bombo Radyo kay Dr. Lyle Peralta Ladera, Municipal Health Officer sang Moises Padilla, ginpahayag sini nga asymptomatic kag yara sa maayo nga kondisyon ang lapsag.
Suno kay Ladera, wala ini nagasuprer sang ubo, sip-on ukon hilanat.
Suno sa iya, Hunyo 21 sang nag-abot ang bata kaupod ang iya nga iloy kag tiyo nagikan sa Quezon City paagi sa Air Asia flight.
Suno diri, ginkuhaan sila sang swab test sa airport kag gindiretso sa ila balay sa Brgy. Udyong, Moises Padilla para sa strict home quarantine.
Suno sa health officer, ginhome quarantine ang mga ini kag wala gindala sa quarantine facility agud indi ma-expose ang lapsag sa posible nga balatian nagikan sa mga pumuluyo nga nakaquarantine.
Sa karun, wala pa nakagwa ang resulta sang iloy kag tiyo sini apang gindala na sila sa EB Magalona quarantine center kun sa diin ginseparar ang tiyo samtang updanay naman ang iloy kag lapsag.
Suno kay Ladera, wala man sang may macontact trace nga mga persona bangud gindiretso ang mga ini sa Moises Padilla nagikan sa airport.
Nagpanawagan man ini sa mga pumuluyo nga indi pag-idiscriminate ang mga nagpositibo sa COVID kag magbuligay na lang agud indi maglapta ang virus.
