BACOLOD CITY-Padayon pa nga ginatumod ang identity sang duha ka mga miyembro sang New People’s Army (NPA) nga napatay sa engkwentro sa tunga nila sang 62nd Infantry Battalion sa Sitio Agpapatao, Brgy. Binobohan, Guihulngan City, Negros Oriental pasado alas 6:00 kagab-i.
Sa interview sang Bombo Radyo Bacold kay Col. Inocencio Pasaporte, commander sang 303rd Infantry Brigade sang Philippine Army, ginpahayag sini nga indi magnubo sa 10 ka mga miyembro sang NPA ang naengkwento sang mga suldado.
Suno sa kay Pasaporte, nagapatigayon sang combat operations ang militar sang nagsugat-anay ang duha ka grupo kag nagbayluhanay sang luthang sa masobra 10 ka minutos kun sa diin duha ka mga miyembro sang makawala nga grupo ang napatay.
Ini ang kasunod sang report sang mga concerned citizens nga may yara sang presensiya sang rebelde nga rupo sa lugar kag nagatuga sang kahadlok sa mga residente.
Narekober sa encounter site ang duha ka .45 calibre pistol; isa ka .38 calibre pistol; apat ka .45 calibre magazine nga may mga live ammunitions; .38 calibre ammunitions; improvised shotguns kag mga dokumento.
Sa karun, ginahulat pa nga mapapanaog ang bangkay sang duha agud makompirmar ang ila identity.
